gkjw.web.id

Rabu, 10 Maret 2010

Talk Less Do More 
[Aja Kakehan Omong]

Waosan : Matius 5: 17-19
Jejer : Sing sapa nglakoni lan mulangaké kabèh pepakoning Torèt... (ayat 19)
Pujian : KPK 91

Menawi panjenengan gatosaken, tembung punika asring kita panggihi ing salah satunggaling iklan ingkang kapasang ageng ing baliho pinggir margi punapa dene ing TV. Tembung punika ngatag tiyang supados langkung kathah tumindak tinimbang wicanten. Manungsa punika katitah kanthi asta kalih, lan tutuk satunggal. Tegesipun, manungsa kedah langkung sekedhik wicanten lan kathah tumindak. Nanging, nyatanipun asring kosok wangsulipun. Kathah tiyang, prigel lan pinter anggenipun wicanten. Nanging menawi kedah nglampahi, nggih.. mangke rumiyin. Samangke, kita manggihi kathah aturan lan undang-undang ingkang ngatag tiyang supados saged lumampah kanthi sae. Nanging, kanthi kathah UU lan aturan. Tiyang ing pakunjaran inggih boten saya suda, nanging tetep lan malah saya kathah.

Tiyang ingkang pitados dhumateng Gusti, katimbalan nglampahi gesang nglangkungi punapa ingkang kaserat ing aturan. Karana, menawi tiyang saestu ngugemi gesang timbalanipun minangka tiyang Kristen kang ngristeni, boten badhe tumindak ala lan nerak pepaken. Boten ateges, ngicali aturan lan UU ingkang wonten. Nanging, justru punapa ingkang boten pareng kalampahan kados ing aturan kalawau boten nate kapikir punapa malih kok kalampahan. Kados pangandikanipun Gusti, Sampun ngantos kados tiyang Farisi ingkang pinter bab aturan lan Toret nanging lampahipun malah tebih saking angger-angger punika. Gusti Yesus paring tuladha, bilih rawuhipun nindakaken Toret. Gusti Yesus, tumindak langkung rumiyin lajeng ndhawuhaken punapa ingkang sampun katindakaken. Punika intinipun gesang enggal ingkang kadhawuhaken dening Gusti.

Gusti, mugi kawula tansah kasagedna langkung kathah tumindak sae tinimbang wicanten kanthi sae.